एकदेव अधिकारी ः परिचय, प्रवृत्ति र लघुकथा

 एकदेव अधिकारी

माता, पिता ः पद्मकुमारी अधिकारी, उमानाथ अधिकारी

जन्ममिति ः वि.स. २०३१ असार ४

जन्मस्थान ः रत्ननगर नगरपालिका ५, चित्रसारी, चितवन

लघुकथा कृति ः 

भिखारी (२०७६)

स्वको खोजी (२०७५) विभिन्न विदेशी भाषाका लघुकथाको नेपाली अनुवाद

सम्पादित संकलन प्रयोग–केही रेच्की गल्फहरूको अंग्रजी अनुवाद 

थप परिचय ः

—चितवनमा रहेर शिक्षण एवम् साहित्यिक क्षेत्रमा सक्रिय ।

—लेखन, सम्पादन एवम् अनुवाद ।

—फेसबुक पत्रिका लघुकथा कुनोका सञ्चालक ।

सम्पर्क नम्बर ः ९८५५०३८०

प्रवृत्तिहरू ः 

 — राजनीतिक विकृतिको आलोचना ।

— सामाजिक विभेद एवम् अन्यायजन्य गतिविधिको विरोध ।

—शिक्षा क्षेत्रका विकृतिप्रति व्यङ्ग्य । 

— पारिवारिक जीवनका समस्याको प्रस्तुति ।  

—गैरसरकारी संस्थाका गलत गतिविधिको आलोचना । 

—पारिवारिक जीवनका समस्याको प्र्रस्तुति । 

— पुस्तान्तरणका समस्या । 

—ससाना वाक्य एवम् अनुच्छेदको प्रयोग ।

— सुत्रात्मक अभिव्यक्ति ।

वन्यजन्तु संरक्षण सप्ताह

वन्यजन्तुको संरक्षणमा काम गर्ने देशकै एक ठूलो गैरसरकारी संस्थाले वन्यजन्तु संरक्षण सप्ताह कार्यक्रमको आयोजन गर्यो । सप्ताहको पहिलो दिन कार्यक्रमको उद्घाटन सत्र सुरू हुँदै थियो । कार्यक्रम आयोजकले प्रमुख अतिथि मन्त्रीज्यूसँग प्रश्न सोधे–“मन्त्रीज्यू, उद्घाटनको समय हुनैलाग्यो । खाजामा के बनाउँ ?”

मन्त्रीज्यूको मुखबाट फ्याट्ट जवाफ निस्कियो–“बँदेलको सुकुटी तयार गरेर राख्नु, म रिबन काटेर आइहाल्छु ।”

केन्द्राध्यक्ष

परीक्षा चलिरहेको चौथो दिन विज्ञान विषयको परीक्षा करीब सकिनै लागेको थियो । जिल्ला शिक्षा कार्यालयले खटाएको जिल्लाको घुम्ती निरीक्षण टोली ढोकामा आइपुगेको देखेर केन्द्राध्यक्ष ढोकामै स्वागत गर्न पुगे । घुम्ती टोलीलाई मूलद्वार वरपर नै केहीबेर अल्झाएर केन्द्राध्यक्ष आफ्नो केन्द्रको बखान गर्दै थिए–“हेर्नुस्, हामीले चिट चोर्न त परै जाओस्, भित्र लैजान समेत दिएका छैनौं ।”

“तपाईँ त हामीपट्टिकै मान्छे । यो केन्द्रका अधिकांश विद्यार्थी पनि हामीपट्टिकै त छन् नि । तपाईँप्रति हामीलाई पुरापुर विश्वास छ । यसपालिको उत्कृष्ट परीक्षा केन्द्रमा सिफारिस समेत गरिसकेका छौं ।”

केही क्षणमै परीक्षा पनि सकियो । विद्यार्थीहरू एकएक गर्दै हासिलो मुद्रामा बाहिरिए । विज्ञान विषय शिक्षकको अनुहार थकित र फुङ्ग उडेको देखिन्थ्यो । उनी केन्द्राध्यक्षलाई अरूले नेदेख्ने गरी केही इशारा गर्दै शिक्षक कक्षतिर लागे । 

निरीक्षण टोली पनि केन्द्राध्यक्षसँगै चियापानमा केहीबेर भुलेर विदा माग्दै हिँड्ने तरखरमा लागे । त्यतिकैमा विद्यालयको पियन रामे केन्द्राध्यक्षतर्फ आउँदाआउँदै भन्न थाल्यो, “सर, कोठाको पछाडिपट्टि फ्याँकिएको कागज दुई बोरा भयो । कबाडीमा पठाउने कि ?”

“हुँदैन, एउटा खाल्डोमा राखेर पोलिदिनु ।”