सिन्धु गौतम ः परिचय, प्रवृत्ति र लघुकथा

सिन्धु गौतम

सिन्धु गौतम ः परिचय, प्रवृत्ति र लघुकथा 

माता÷पिता ः सीता गौतम, डा. लक्ष्मणप्रसाद गौतम

जन्ममिति ः  वि.स. २०४४ कार्तिक २६

जन्मस्थान ः  भरतपुर, चितवन

लघुकथा कृति ः कर्कलाको शीत (२०६८) एवम् आजका लघुकथा (संयुक्त, २०७४)

थप परिचय ः

—वीर अस्पतालमा स्टाफ नर्स ।  

—लघुकथा समाजको कार्यसमिति सदस्य

सम्पर्क नम्बर ः ९८४१७२६९०१

प्रवृत्तिहरू ः 

 —  राजनीतिक अपराधिकरणप्रति चिन्ता व्यक्त ।

— राजनीतिक विसङ्गतिको विरोध ।

—शिक्षा क्षेत्रका समस्याको प्रस्तुति । 

— स्वास्थ्य क्षेत्रका बेथितिको आलोचना ।  

—आधुनिक सभ्यताका नाममा देखिएका छाडा गतिविधिप्रति असहमति । 

—मानवीय सम्वेदनहीनताप्रति चिन्ता । 

— छोटा छोटा अनुच्छेदको प्रयोग । 

— सम्वादात्मक शैलीको प्रयोग ।

— व्यङ्ग्यात्मकता एवम् सन्देशमूलकता ।

सेतो कोट

बेडमाथिको बेडसिट खुम्चिएर एउटा कुनामा जम्मा भएको छ । सबैमा आआफ्नै वेदनाको चिच्याहट छ । म पनि त्यही एउटा बेडको छेउमा मेराी आमालाई सुम्सुम्याउँदै थिएँ । आमाको असहाय वेदना भोग्दै थिएँ मानसिक रुपमा । त्यहाँको भद्रगोल व्यवस्था तथा वास्ता नगर्ने प्रवृत्तिले म गएको केही क्षणमै शिथिल भएकी थिएँ ।

एउटा सेतो कोटको अनुहार परिचित लाग्यो । कतै देखेको अनि बोलेको जस्तो पनि । 

मनमा थोरै साहस बटुलेर केही सहयोग र सल्लाह पाइहाल्ने आशा लिएर नजिकै गएँ । बोल्न खोजेँ तर मेरो सोधाइ प्रतिक्रियाविहीन भयो । आमाको अवस्था एक पटक हेर्नका लागि आग्रह गर्दा पनि वास्ता गरेन त्यो सेतो कोटको परिचित अनुहारले । निराश भएर फर्किएँ आमा पल्टिरहनु भएको बेड नजिकै ।

कताकता मनमा आक्रोश पलायो ।

 

उही वातावरण, उही चिच्याहट, तर मात्र ठाउँ थियो फरक । के ठाउँले गर्दा मानिसको सिद्धान्त अनि व्यवहार नै फरक हुन्छ त ? आफैले आफैलाई प्रश्न गरेँ ।

उही सेतो कोट एउटा निजी अस्पतालमा एक रूपमा र सरकारी अस्पतालमा अर्को रूपमा थियो ।

नियमपालना

–नियम पालना गरौँ, सभ्य नागरिकको पहिचान दिऔं ।

–बसमा झुण्डिएर जोखिमपूर्ण यात्रा नगरौं ।

–सिट सङ्ख्या र यात्रु सङ्ख्या बराबर ।

 

–सवारी नियमको पालना गरौं, अकाल मृत्युबाट बचौं ।

–हेल्मेट लगाऔं, आफूलाई जोगाऔं ।

यस्तैयस्तै लेखेका बोर्ड र पर्चाहरू छ्यापछ्याप्ती छन् आजभोलि सडकतिर ।

ट्राफिक प्रहरीको जिम्मा हामी सर्वसाधारणलाई नियम पालना गर्न सहयोग र सर्तक गराउने ।

अलिकति नियम पनि पालना भएकै देखिन्छ सडकतिर । हुन त जुनसुकै सवारी चालकलाई ट्राफिक नियम तोड्दाको मज्जा नै छुट्टै हुन्छ ....। 

यही भएरै होला, सबै ठाउँमा पालना गरिँदैन नियम.... ।

आज अनौठो दृश्य ठोकियो आँखैमा ।

बसको अगाडि पछाडि दुवैतिर व्यानर छ ः

‘झुन्डिएर यात्रा नगरौं ।’

बसभित्र कोचाकोच यात्रु छन् ।

बाहिर उतिकै झुन्डिएका छन् ।  

एकहातले डन्डी समातेर ती झुन्डिनेमा सर्वसाधारण पनि छन् ।

अनि नियमपालना गराउने जिम्मा लिएका मध्येका एक ट्राफिक पनि......।